Ánne Márjá Guttorm Graven lea máŋggabealat kulturbargi ja sámegielovddasteaddji. Son bargá jorgaleaddjin ja logaldallin, váldá maid jietnaneavttárbargguid ja láve maid jođihit ságastallamiid. 2019:s oaččui Sámedikki giellaloktenbálkkašumi barggu ovddas maid lea dahkan johtti sámegielat snapchatkontoin Snaepmie:in. Son doaimmaha maid vuosttaš sámegielat podkástta Sis-Finnmárkku syndroma. Lea ovdal doallan sátnedujiid NRK Sámis, lea čállán sátnedujiid Š-bláđi ovddas, ja lea leamaš oassin podkásttas NRK Sámis man namma lea Manin ja danin. 2017-2019 lei son mielde Čális Fal 2! girječálliidoahpus. 2020 giđa ráhkadii son oanehisdogmedoku Mo dieppe? Sergey Gavrilovain, oassin Internašunála Sámi Filbmainstituhta Oru lea buoret go jođi-prošeavttas. Son lea maid mielde Riddu Riđđu prošeavttas Reaškkas man ulbmil lea oažžut eanet komihkkáriid Sápmái. Plána mielde leat prošeavttas vuosttaščájálmasat 2021 Riddu Riđus.
2019:s ilmmai Ánne Márjjá vuosttaš čáppagirjjálaš girji, diktačoakkáldat Suorbmageažis. Diktačoakkáldagas son guoskkaha fáttáid nu mo heahpat, ballu, oktonasvuohta, iešsorbmen ja iešsorbmenjurdagat.
Dál son lea čálligoahtán romána, ja lea dasa masa son áigu čiekŋudit go lea Lásságámmis. Ulbmil orrumiin lea njulgestaga čállin, čállit ja čiekŋudit muitalussii mainna lea bargamen. Son smiehttá dálus maid lea vuoigŋa mii veahkehivčče su ovdánit bargguin. Árgabeaivvis lea váttis vuoruhit čállima. Čállin lea áddjás proseassa, ja ii leat sihkkar dat buktá sisaboađuge, danne dávjá vuoruha jorgalanbargguid ovdal čállima, vaikke váimmustis háliidivčče čállima válljet. Dál go beassá Lásságámmii, beassá maid dovdat mo lea go birrajándora sáhttá vuoruhit čállima. Dovdat mo lea go lea albma bargoráfi. Orrun Lásságámmis addá Ánne Márjái vejolašvuođa boahtit johtui fas čállimiin, ja go bures vuos lea boahtán johtui de lea stuorát vejolašvuohta nagodit buori leavttuin joatkit. Lásságámmi álggaha hutkás jagi Ánne Márjái.
Giitevašvuođain lávke Ánne Márjá Lásságámmii ođđajagimánu 4. beaivve 2021.