 |
| Foto: Carl-Johan Utsi |
Sutnje lea meahcci ja luondu álo leamaš guovddážis eallimis, mánnávuođa rájes. Bajásšattadettiin lei meahcci stoahkanšillju ja maiddái skihppár. Beaska Niillas lea bargan feará maid muhto áidna virggálaš oahppu maid lea gazzan lea fágareivve duojis. Ovttagaskka barggai neavttárin sihke Beaivváš Nášunala teáhteris ja maiddái Giron Sámi Teáhteris ovdal šattai duodjeoahpaheaddjin. Dan maŋŋá lei guolásteaddji muhtun áiggi. Maŋimuš logenear jagi leamaš son mielde Sámi politihkas ja maiddái aktivistan dáistalan sihke Sápmái ja earáide veahkkin suodjalit eallinvugiid, eatnamiid ja čáziid.
"Máŋggaid jagiid lean jurddašaddan, alddán čálašan ja ságastallan olbmuiguin álgoálbmogiid diliin ja iešmearrideami dárbbašlašvuođas. Mu áigumuš Lásságámmis lea geahččalit čohkket ja čorget sihke čállosiid ja jurdagiid, jus de mat das boađašii vaikko girji. Jáhkán Lásságámmis gávdno dat ráfi mii dárbbašuvvo buokčalit jurdagiid jávrái. Muhto dan ferte dieđus oaidnit."